$180 葵芳 做奥运箭神 ！潮整紫薯栗蓉月饼
呢间射箭教室，俾$180就可以体验做奥运射箭选手嘅乐趣！星期六同日都有得玩，学员会配备奥运射箭项目使用嘅反曲弓一把，仲有箭用箭袋，Full gear上阵，课程约1.5小时，4-8人上堂，喺呢1.5小时入面，第一阶段先係学习基本安全知识，第二阶段係技巧练习，导师会从旁指导，纠正学员嘅姿势，第三阶段就係比赛，亦係最好玩嘅部份，可以同其他学员斗射得高分！提一提大家，由于射箭运动始终有一定危险性，所以参加者一定要12岁以上！
记者Ducky试玩，射咗3枝箭，第一支中10分，其余两支都係9分！教练都话成绩唔错，不过当距离由5米增加到去7米，Ducky就即刻失準，仲射出界添！原来因为玩得耐，手臂肌肉攰会影响準绳度，休息一阵先再玩，命中率较大机会高返！仲有小贴士俾大家，就係站姿一定要够端正，重心尽量唔好有偏差，射出去嘅箭会準啲。
致胜射箭
地址：葵芳葵丰街41号安福工业大厦8楼E及F室
电话：5307 3328
网页
潮整紫薯栗蓉月饼！9楼呢间甜品教室，有得学整潮州月饼，外层係圈圈状嘅酥皮，馅料可以拣人气嘅紫薯栗子蓉，又或者係较为传统芋泥，学费$340，一次可以整到8个，平日上堂就4-6人一班，星期六、日就6-12人一班。另外仲可以学近期好hit嘅韩式唧花蛋糕，课程用嘅唧花材料係鲜忌廉，比一般使用嘅牛油忌廉食落无咁油腻，有分初阶班同中阶班，初阶班嘅唧花（6吋蛋糕）会佔蛋糕一半左右位置，时间要3至4小时，而中阶班（7吋蛋糕）就会成个蛋糕围边唧晒，时间要5至6小时，。如果想玩唧花，但又想平少少试下先，仲有个小花盆蛋糕班，学费$300，可以整到4个迷你花盆海绵蛋糕。
Joycake
地址：葵芳葵丰街41-45号安福工业大厦9字楼H室
电话：2439 9208
网页
$90 亲子灯笼製作班再上多几层，15楼有个亲子Party room，9月头开张，设施都好新，仲设有育婴室同独立洗手间，方便妈咪。而近期有个亲子灯笼製作班，$90可以一个大人同一个小朋友齐齐学整灯笼，如果两个大人同一个小朋友参加，就$120，玩1.5小时。其实都几抵玩，因为单係灯笼款已经有10款拣，同埋头45分钟係学整灯笼，之后45分钟就可以使用Party room内嘅设施，内有小型波波池、吹气城堡等。负责人话中秋节正日都会开班，即日整完个灯笼，夜晚就拎去玩，小朋友实开心晒喇。
Surprise Party 十派
地址：葵涌葵丰街41-45号安福工业大厦15楼E至F室
电话：9138 5799
Facebook Page
玩到饿，食乜好？安福工业大厦附近都係得茶餐厅，但其实行出少少，约5分钟路程，就会到葵青剧院同新都会广场，两边都係美食集中地，有几好hea嘅牧羊少年咖啡茶酒馆，亦都有海南风味三层tea set，俾大家食饱饱。
牧羊少年 邪恶芝士肉酱薯条以旅游为题，走文青路线嘅牧羊少年咖啡．茶．酒馆，门口成个蒙古包咁，够晒异国风，入面卖嘅食物都係多国菜，包括美式芝士肉酱薯条，热熔芝士舖满面，仲有牛肉肉酱，邪恶度爆灯！仲有和风烧汁鳗鱼PIZZA，面层有郁郁下嘅木鱼丝，入面有烧汁馒鱼肉，锺意fusion菜嘅朋友都可以试下！
牧羊少年咖啡．茶．酒馆
地址：葵芳兴宁路12号葵青剧院地下2号舖
电话：2439 5669
营业时间：8am-11pm
南洋Afternoon Tea 每人唔使$100
喺新都会广场嘅少爷18，主打东南亚fusion菜，餐厅内有个三层架tea set，有别于一般英式下午茶，食物主要係东南亚菜式，鹹点包括鸡肉沙嗲串、印度咖哩角同新加坡鲜虾春卷。而甜点则有一口斑兰咖央多士、椰香脆香蕉同榴槤朱古力饼，配咖啡或茶。一个tea set 两个人食都係$138，计埋加一每人唔使$100，又有得坐下，算合理。亦有传统马拉烧春鸡，以参巴酱、黄姜、香茅、乾葱等腌过鸡嚟烧，食落鸡肉渗有浓郁香料味，酸中带辣，香浓惹味。新加坡香辣虾意粉则以番茄跟辣椒做酱，食落有辛劲。
少爷18
地址：葵芳兴芳路223号新都会广场4楼410-412号
电话：2156 2228
营业时间：11:30am-11pm
